Fyrsti dagurinn í Jerúsalem að kvöldi kominn

Jæja, hér í Jerúsalem er klukkan orðin hálf tólf og fyrsti dagurinn okkar hér úti því að kvöldi kominn.

Eftir að hafa lagt okkur eftir langt ferðalag fengum við heimsókn frá Pálínu Ásgeirsdóttur en hún starfar hjá Alþjóða Rauða krossinum hér ytra. Hún bauð okkur í bíltúr og sýndi okkur helstu hluta Jerúsalemborgar. Borgin hefur mikinn sjarma en á mörgum stöðum má sjá mikið rusl, illa farin hús, brennda bíla og veggjakrot.

Um kvöldmatarleytið hittum við kollega okkar frá Danmörku og Ítalíu en þau höfðu komið hingað síðdegis. Við settumst með þeim að snæðingi og kynntumst hvert öðru. Dönskukunnátta okkar hefur loksins komið að góðu gagni.
Þátttakendurnir frá Frakklandi lentu í Tel Aviv um klukkan 17 í dag en þeir voru því miður stoppaðir á flugvellinum og teknir í yfirheyrslur. Einn þeirra kom hingað á hótelið uppúr kl. 22 en þegar þetta er skrifað eru hinir tveir enn ókomnir, þeir eru þó samkvæmt okkar heimildum á leiðinni.

Veðrið er nokkuð líkt því sem við þekkjum á Íslandi. Þegar við lentum í Tel Aviv var rok, rigning og þrumuveður en nú hefur stytt upp að mestu. Þessa stundina er rok og ansi kalt.

Í fyrramálið munum við mæta á öryggiskynningu á vegum Alþjóða Rauða krossins hér í Jerúsalem en að henni lokinni munum við halda til Ramallah í Palestínu. Næstu þremur dögum munum við eyða í Ramallah og Qalqilya en við munum gista báðar næturnar á Gistihúsi Rauða hálfmánanns í Ramallah. Að kvöldi þriðja dags munum við koma hingað til Jerúsalem á ný.

Við erum búin að setja inn nokkrar myndir frá deginum í dag. Sjá myndaalbúmið hægra megin á síðunni. Fleiri myndir koma inn á næstu dögum. 
Látum mynd af okkur ásamt Pálínu fylgja með hér í lokin.

Viðtal í Fréttablaðinu

Bendum á viðtal við Gunnlaug í Fréttablaðinu í dag.

Sjá viðtalið: http://palestinufarar.blog.is/users/6c/palestinufarar/img/frettab.jpg 
eða http://vefblod.visir.is/index.php?s=2862&p=70784

 

 

 

 

 

Komin til Jerúsalem

Nú erum við komin á hótelið okkar og höfum það gott hér.

Ein taska týndist þó. Það var taskan hennar Sólveigar sem er starfsmaður Rauða kross Íslands og er með okkur í þessari för. Vonandi kemur taskan í leitirnar sem fyrst en hún inniheldur m.a. gjafir til gestgjafa okkar í Palestínu en þangað förum við á morgun.

Við stefnum þó á að leggja okkur núna eftir að hafa verið á ferðinni síðustu 15 klukkustundirnar.

Í kvöld er svo matur með ungmennunum frá Danmörku, Frakklandi og Ítalíu.

Íslensk ungmenni til Palestínu

Viðtalið á Bylgjunni

Við mættum eldhress á Bylguna í morgun ásamt Sólveigu Ólafsdóttur, sviðstjóra hjá Rauða krossinum.
Þar hittum við þau Kollu og Heimi og spjölluðum við þau um ferðalagið okkar sem hefst á morgun.

Viðtalið má finna á slóðinni: http://bylgjan.is/lisalib/getfile.aspx?itemid=42848

Endilega haldið áfram að fylgjast með!

Fjölmiðlaumfjöllun

Nú er ferðin okkar byrjuð að rata í fjölmiðla enda orðið stutt í brottför!

Í fyrramálið (26. febrúar) um kl. 8.45 verðum við í beinni í þætti Heimis og Kollu, Ísland í bítið.
Í dag var einnig tekið blaðaviðtal við Gunnlaug sem væntanlega birtist í Fréttablaðinu á laugardaginn.

Nú liggur endanleg ferðatilhögun fyrir og við leggjum af stað frá Keflavíkurflugvelli kl. 16.30 næstkomandi föstudag. Fljúgum til London og þaðan til Tel Aviv.

Þar sem um mjög verðugt verkefni er að ræða leggjum við mikla áherslu á að koma sem mest fram og fjalla sem mest um ferðina, bæði fyrir og eftir.
Því hvetjum við alla (fjölmiðla, skóla, vinnustaði eða einstaklinga) sem hafa áhuga á að kynna sér ferð okkar betur til að setja sig í samband við okkur.

Styttist í ferðina til Palestínu

Nú er seinni undirbúningsdegi vegna ferðar okkar til Palestínu lokið en við munum halda á vit ævintýranna í lok næstu viku.

Á undirbúningsdögunum tveimur sem haldnir voru á landsskrifstofu Rauða krossins í Efstaleiti 9 var m.a. farið yfir öryggismál, starf Rauða krossins innanlands og erlendis, kynningarmál eftir heimkomu heilbrigðismál og margt fleira gagnlegt.

Tilgangur ferðarinnar er að við fáum að kynnast aðbúnaði ungmenna í Palestínu með það að markmiði að kynna aðstæðurnar fyrir Íslendinum þegar heim er komið.

Um leið og við komum út tekur á móti okkur rúmlega vikulöng dagskrá.
Föstudaginn 27. febrúar fljúgum við til London og þaðan til Tel Aviv í Ísrael þaðan verður okkur ekið til Jerúsalem en þar munum við gista flestar næturnar.
Á meðan á dvölinni stendur munum við m.a. heimsækja Ramallah, Hebron og Qalqiliya. Við munum heimsækja fjölskyldur í Qalqilya og kynnast fjölskylduaðstæðum þar og m.a. fylgja börnum fjölskyldunnar í gegnum skóladag.

Nú eru 10 dagar í brottför og verða þeir vel notaðir í bólusetningar og annan undirbúning. 

Við hvetjum ykkur öll til að fylgjast með hér á bloggsíðunni.

Undirbúningsdagar

Mánudaginn 17. febrúar og þriðjudaginn 18. febrúar eru undirbúningsdagar hjá okkur vegna ferðar okkar til Palestínu.

Við förum út föstudaginn 27. febrúar og komu heim á ný sunnudaginn 8. mars.

Endilega fylgist með ferðum okkar í Palestínu í gegnum þessa bloggsíðu okkar.